Бангкок қаласында бокстан Қазақстан құрамасы үшін "Thailand Open-2025" халықаралық турнирінің үшінші күні жартылай табысты аяқталды.
Алдымен жарыс алаңына шыққан Оразбек Асылқұлов (60 кг) ширек финалда жергілікті боксшы Тханпхансакон Каласиреге төрешілердің екі де бір есебімен жол берді. Жекпе-жек тартысты өткенімен соңғы шешім тай боксшының пайдасына шықты.
Оразбектен кейін шаршы алаңға шыққан Данияр Рахымбердиев (90 кг) Украина өкілі Евгений Павловскийді айқын басымдықпен жеңді. Барлық төреші Даниярдың пайдасына шешім қабылдады. Бұл Қазақстан үшін алғашқы жеңіс болды.
Ал қыздар арасында өнер көрсеткен Назерке Серік (65 кг) таиландтық Таная Сомнуекке есе жіберді. Ринг қожайыны жеңісті бірауызды төрешілер шешімімен өз есебіне жазды.
Кешкі кездесулерде төрт дүркін Азия чемпионы Төрехан Сабырхан (70 кг) филиппиндік Рональд Чавеске еш мүмкіндік қалдырмай жартылай финалға шықты.
Ал аса ауыр салмақтағы Даниял Сапарбай рингте үндістандық Аншул Гиллмен кездесіп, барлық төрешінің шешімімен жеңілді. Қарсылас тактикалық артықшылығын толық пайдалана алды.
Кештің соңғы кездесуінде Азия чемпионы Виктория Графеева (әйелдер) сингапурлық Занн Чиді 5:0 есебімен сенімді түрде жеңіп, келесі кезеңге өтті.
