Америкалық боксшының айтуынша, GGG оны тым қауіпті қарсылас деп есептеп, жекпе-жектен саналы түрде бас тартқан.
Орта салмақтағы бұрынғы WBC чемпионы, америкалық Джермалл Чарло (33-0, 22 КО) алдағы жекпе-жегі және Геннадий Головкинмен кездеспей қалуы жайлы пікір білдірді. Боксшының сөзінше, GGG оны жоғары тәуекелі бар қарсылас деп бағалап, жекпе-жектен әдейі бас тартқан.
Чарло ұзақ үзілістен кейін 31 мамырда Лас-Вегаста отандасы Томас ЛаМаннамен (39-5-1, 18 КО) қолғап түйістіреді. Бұл – Джермаллдың 2023 жылдың қарашасынан бергі алғашқы жекпе-жегі болмақ.
The Ring басылымына берген сұхбатында Джермалл Чарло өзіне қарсы рингке шығудан бас тартқан әлемдік жұлдыздарға шүйлікті:
«Мен Томас ЛаМаннаны ешқашан бағаламаймын. Бірақ бұл менің мұрам, мен тәуекелге бәрін тігемін. Енді түсіндім: неге "Канело", неге GGG және басқа да үлкен есімдер менімен рингке шыққысы келмеді. Олар мені жоғары тәуекелі бар, бірақ аз ақы төленетін қарсылас ретінде көрді», — деді ол.
Оның айтуынша, егер ол бұл жекпе-жекте айқын жеңіске жетсе де, жанкүйерлерден ерекше қолдау күтпейді. Себебі бұл нәтиже бәріне «күтілетін нәрсе» болып көрінуі мүмкін.
