Thailand Open-2025 халықаралық турнирінде Қазақстан құрамасы екі жекпе-жек өткізді. Бұл бәсекеге ерлер мен әйелдер ұлттық құрамалары қатысып жатыр.
55 келіге дейінгі салмақ дәрежесінде өнер көрсеткен Нұрсұлтан Алтынбек ширек финалда жапондық Сейджуро Мидзогутимен кездесті. Қазақстандық былғары қолғап шебері төрешілердің бірауызды шешімімен жеңіске жетіп, жартылай финалға жолдама алды. Бұл нәтиже оған кем дегенде қола медальді қамтамасыз етеді.
Ал әйелдер арасындағы 48 келі салмақ дәрежесінде өнер көрсеткен Гүлназ Бүрібаева украиналық Ольга Шалимоваға қарсы жекпе-жекте бөлінген төрешілер шешімімен жеңіліп қалды. Осылайша, ол жарыстың жартылай финалына өте алмай, жүлдеден тыс қалды.
Thailand Open-2025 турнирі 24 мамыр мен 1 маусым аралығында Таиланд астанасы Бангкокта өтуде. Бұл додаға Қазақстаннан бөлек, Өзбекстан, Үндістан, Қытай, Филиппиндер, Оңтүстік Корея, Солтүстік Корея, Қытай Тайбэйі сынды елдердің үздік боксшылары қатысып жатыр.
