Танымал бапкер Мұхит Амантаев Бақыт Сәрсекбаевтың болашақта Қазақстан боксына қосар үлесі зор екенін айтты.
Қазақстандық танымал бокс бапкері Мұхит Амантаев YouTube желісіндегі "Бірінші бол" арнасына берген сұхбатында 2008 жылғы Бейжің Олимпиадасының чемпионы Бақыт Сәрсекбаев туралы пікір білдірді. Оның айтуынша, Сәрсекбаев секілді тәжірибелі мамандарды қазірден бастап ұлттық құрама жұмысына тарту қажет.
"Екі Олимпиаданы "нөлмен" өткіздік. Тағы қанша күтеміз? Бір-бірімізге аяқтан шалып, іштарлық жасайтын кез артта қалды. Қазір Сәрсекбаевты тарту керек, Бақыт аға жұмыс істеуі тиіс. Қайрат аға — өте мықты бас бапкер. Бірақ Бақыт — болашақта оның орнын баса алатын мамандардың бірі. Олимпиадаға үш жыл қалды. Қазірдің өзінде Бақытты құрамаға қосу қажет. Бас бапкер болмаса да, кем дегенде Қайрат ағаның көмекшісі ретінде", — деді Мұхит Амантаев.
Айта кетейік, қазір Бақыт Сәрсекбаев Қазақстанның 22 жасқа дейінгі бокс құрамасының бас бапкері қызметін атқарады. Жақында Шри-Ланканың Коломбо қаласында өткен жастар арасындағы Азия чемпионатында оның шәкірттері 22 алтын медаль жеңіп алды.
