UFC ресми түрде ирландиялық файтердің ұйымның допингке қарсы бақылау жүйесіне (тестілеу пулына) қайта қосылғанын растады.
UFC-дің ресми сайтында жарияланған мәліметке сәйкес, МакГрегор соңғы бір жыл ішінде бір рет допинг сынамасынан өткен. Бұл оның аралас жекпе-жекке қайта оралуға жақын екенін білдіреді.
37 жастағы ирландиялық файтер 2021 жылдың шілде айынан бері UFC турнирлеріне қатыспаған. Сол жылы UFC 264 кешінде Конор америкалық Дастин Порьеге қарсы октагонға шыққан болатын. Алайда бірінші раундта аяқ сүйегін сындырып, техникалық нокаутпен жеңіліп қалды.
Дастин Порье ол кезде жеңіл салмақтағы уақытша чемпион атағын иеленген. Ал МакГрегор үшін бұл жекпе-жек ең соңғы кездесу болды.
Кәсіпқой мансабында Конор МакГрегор 22 жеңіске жетіп, 6 рет жеңіліс тапқан. Ол UFC тарихындағы алғашқы қос салмақ дәрежесінде чемпион атанған спортшы ретінде танымал — жартылай жеңіл (66 кг) және жеңіл салмақ (70 кг).
