Тайланд астанасы Бангкокта World Boxing ұйымы ұйымдастырған жастар арасындағы алғашқы Азия чемпионатында (U19) жартылай финалдық жекпе-жектер жалғасуда.
Қазақстан намысын 80 келіге дейінгі салмақта қорғаған Құралай Егінбайқызы финалға жолдама үшін өзбекстандық Рухшона Парпиеваға қарсы шықты. Үш раунд бойы айқын басымдық көрсеткен Құралай жекпе-жекті төрешілердің бірауызды шешімімен (5:0) жеңді.
U19 Азия чемпионатының финалдық айқастары 10 тамызда өтеді. Қазақ жанкүйерлері Құралайдың алтын үшін тартысын осы күні тамашалай алады.
Айта кетейік, Құралай Егінбайқызы биыл мамыр айында Шри-Ланка астанасы Коломбода өткен IBA және ASBC ұйымдастырған жастар арасындағы Азия біріншілігінде де жеңімпаз атанған. Ол жарыста Қазақстан құрамасы жалпы есепте 41 алтын медаль иеленіп, тарихи нәтиже бағындырды.
