АСА лигасының вице-президенті Асланбек Бадаев өзінің YouTube-арнасында қазақстандық файтер Қуат «Найман» Хамитовтың дебюттік жекпе-жегіне пікір білдіріп, оның алдағы жоспарлары жайлы айтты.
Жақында Қуат Хамитов Анатолий Бойконы жеңіп, бірден жаңа қарсылас тапты.
«Анатолий Бойко мен Қуат Хамитовтың жекпе-жегі көпшілікті таңғалдырды. Көп адам Хамитовты андердог санады. Ол тәжірибелі, бірақ жас спортшылармен бәсекеге түсе алмайды деп ойлағандар көп болды. Дегенмен Қуат өзінің күрес стилінің әлі де жұмыс істейтінін және жоғары деңгейде бәсекелес бола алатынын дәлелдеді», — деді Бадаев.
Сонымен қатар вице-президент Бойкоға келешегі туралы ойлануға кеңес беріп, Хамитовтың АСА-дағы мүмкіндігіне баға берді.
«Қуат жарады. Ол лигаға келіп, Бойконы жеңді де, бірден Алексей Махномен жекпе-жекке шақырды. Егер ол бұл ұсынысты қабылдаса, 5 желтоқсанда Мәскеуде Хамитов пен Махно арасындағы айқасты көретін боламыз», — деді ол.
Бадаев бұл кездесуді «жанкүйерлер күтетін, қызу айқас болмақ» деп сипаттады.
Еске сала кетсек, Қуат Хамитов жақында Ресейдің беделді Absolute Championship Akhmat (АСА) ұйымында сәтті дебют жасап, айқын жеңіске жетті.
Жекпе-жектен кейін Хамитов пен Алексей Махно октагонда сөз таластырып, бетпе-бет келді. Соңында екеуі келісімге келіп, болашақ айқасқа уәделесті.
