Флойд Мейвезер мен Мэнни Пакьяо арасындағы жекпе-жектің екінші бөлігі 2026 жылы өтуі мүмкін.
Бокс әлемі тағы да екі ұлы есімнің текетіресін көруге жақын. Флойд Мейвезер мен Мэнни Пакьяо арасындағы екінші жекпе-жек 2026 жылы өтуі мүмкін. Бұл туралы The Ring хабарлады.
Флойд Мейвезер (50–0, 27 KO) мен Мэнни Пакьяо (62–8, 39 KO) — бокс әлеміндегі XXI ғасырдағы ең танымал есімдер. Олардың алғашқы кездесуі 2015 жылы өтті және бокс тарихындағы ең көп күтілген айқастардың бірі болды.
Сол кезде Мейвезер қарсыласын ұпай санымен жеңіп, мансабының ең ірі жеңістерінің бірін тіркеді.
Бұл оқиға спорт тарихында рекорд орнатқан еді:
46 жастағы Пакьяо шілде айында Марио Барриоспен титулдық кездесуде тең нәтиже тіркеп, өзінің әлі де формада екенін дәлелдеді.
Филиппиндік аңыз 2026 жылдың қаңтарында Лас-Вегаста жаңа жекпе-жек өткізуді жоспарлап отыр. Десе де, жуырда ол Халықаралық бокс қауымдастығының (IBA) жаңа вице-президенті болып тағайындалған еді.
48 жастағы Флойд Мейвезер кәсіби бокста 50 жеңіс және 0 жеңіліс көрсеткішімен тарихқа енді. Ол соңғы ресми жекпе-жегін 2017 жылы Конор Макгрегорға қарсы өткізіп, техникалық нокаутпен жеңіске жеткен соң мансабын аяқтады.
Алайда Мейвезер рингтен алыстап кеткен жоқ — ол көрме жекпе-жектеріне белсенді қатысып жүр. 2021 жылы ол Логан Полмен, ал кейін Джон Готти III сияқты қарсыластармен кездесті.
The Ring басылымының мәліметінше, екі тарап арасындағы реванш туралы келіссөздер басталып кеткен. Жекпе-жек 2026 жылы өтуі мүмкін, ал ұйымдастырушылар Лас-Вегас пен Эр-Рияд қалаларын ықтимал алаң ретінде қарастыруда.
