Бұрынғы әлем чемпионы, тегі қазақстандық боксшы Сергей Липинец (18-5-1, 13 КО) Канадада тұратын Артур Биярслановтан (20-0, 16 КО) ұпай санымен жеңілді.
Жекпе-жек Монреаль қаласындағы Casino Montreal аренасында өтті және кештің бірлескен басты айқасы болды. 10 раундқа жоспарланған бірінші жартылай орта салмақтағы бұл кездесуде төрешілер бірауыздан жеңісті Биярслановқа берді — (97–92, 96–93, 99–90).
Айта кетейік, Липинец үшінші раундта нокдаунға түскен.
Жеңілістен кейін Сергей Липинец әлеуметтік желіде жүрекжарды жазбасын жариялады:
«Кейде ринг сенің жұдырық күшіңді емес, жүрегіңнің мықтылығын сынайды. Мен оттан өттім, бірақ басымды төмен түсірмедім. Әр раунд – тек қарсыласпен емес, өз-өзіңмен күрес. Барлығы үшін Аллаға шүкір: ауырсыну үшін де, тәжірибе үшін де, осы жол үшін де. Өйткені шынайы жауынгер сынақ арқылы туады. Бұл соңғы аялдама емес — жаңа тарау», — деп жазды ол.
Бұл Липинецтің биылғы екінші жеңілісі болды. Ол 2025 жылдың ақпанында Лондонда британдық Адам Азимге (13-0, 10 КО) мерзімінен бұрын жеңілген.
Бұрын боксшы IBF нұсқасы бойынша әлем чемпионы титулын иеленген. Сергей Липинец Ақтөбе облысында дүниеге келіп, кейін Ресейге қоныс аударған.
