Геннадий Головкин тағы үш лауазымға үміткер болды

23 қараша күні Италия астанасы Римде өтетін Дүниежүзілік бокс конгресінде федерацияның жаңа басшылығы сайланбақ. Конгресте президент, вице-президент және директорлар кеңесінің жаңа мүшелері анықталады. Сол үміткерлердің қатарында — Қазақстан мақтанышы Геннадий Головкин.

GGG келесі үш лауазым бойынша кандидат ретінде тіркелді:

• Президент: Геннадий Головкин, Мариолис Харилаос;
• Вице-президент: Геннадий Головкин, Чайват Чотима, Мохамед Тума, Райан О’Ши, Иштван Ковач;
• Директорлар кеңесі: Геннадий Головкин және тағы 11 халықаралық өкіл.

Барлық кандидаттардың құжаттары қазір тәуелсіз тексеру комиссиясында қаралып жатыр. Соңғы шешім федерацияның жарғысы мен сайлау ережелеріне сәйкес қабылданады.

Айта кетейік

World Boxing федерациясы — халықаралық спорт қауымдастығының ең маңызды құрылымдарының бірі. Бұл ұйымның жыл сайынғы конгресі әлем боксының даму бағытын, қаржылық ашықтықты және басқару құрылымын анықтайды. Биылғы конгрестің басты тақырыбы — жаңа президентті сайлау. 

Қазіргі президент Борис Ван дер Ворст әзірге уақытша атқарушы кеңес мүшесі ретінде қызметін жалғастырып отыр.

Головкиннің мансабы

Геннадий Головкин — Қазақстан спортының символына айналған тұлға.

• Олимпиада ойындарының күміс жүлдегері
• Әлем чемпионы (2003)
• Кәсіби рингте 44 жеңіс (36 нокаут) және тек 2 жеңіліс
• Орта салмақтағы WBA, WBC және IBF белбеулерінің иегері

GGG соңғы жылдары спорттық мансабын басқарушылық және әлеуметтік бағыттағы жобалармен жалғастырып келеді.