Бокстан ұлттық құраманың көшбасшысы мансабын аяқтады

Күтпеген шешім

Журналист Аслан Қаженов Instagram парақшасында Нұрдәулетовтің шешімін жариялап, боксшының жетістіктерін де атап өтті. Оның айтуынша, Бекзат спорттан мүлде қол үзбейді:

"Маңғыстаудан шыққан ауыр салмақтағы әлем чемпионы Бекзат Нұрдәулетов спорттық мансабын аяқтады. Дегенмен ол бокстан кетпейді. Енді осы салада маман ретінде жұмысын бастап, өңірдегі спорттың дамуына үлес қосады", — деп жазды Қаженов.

Нұрдәулетовтің негізгі жетістіктері

Бекзат Нұрдәулетов Қазақстан боксының соңғы жылдардағы ең тұрақты спортшылардың бірі саналды. Оның еншісінде:

• жасөспірімдер арасындағы әлем чемпионатының қола жүлдесі
• IBA 2019 әлем чемпионы
• Азия чемпионы (2024)
• World Boxing аясындағы Әлем кубогы кезеңінің жеңімпазы (2025, Астана)
• Токио-2020 Олимпиадасының қатысушысы

Сондай-ақ, 2025 жылы ол Ливерпульдегі World Boxing әлем чемпионатында және Дубайдағы IBA ерлер арасындағы әлем чемпионатында да бақ сынады.