Болгарияның София қаласындағы "Странджа" турнирінде Қазақстан құрамасы кезекті финалистін анықтады.
80 келіден жоғары салмақтағы жартылай финалда Валерия Аксеноваға ринг иесі, болгариялық Алейна Мехмед қарсы тұрды. Жекпе-жек ұзаққа созылған жоқ. Қазақстандық боксшы бірінші раундта нокаутпен мерзімінен бұрын жеңіске жетті.
Төреші қарсыласқа нокдаун санап болғаннан кейін, кездесуді 55-секундта тоқтатты.
Осы жеңістен кейін Валерия Аксенова “Странджа”-2026 турнирінің финалына шықты және енді алтын медаль үшін жұдырықтасады.
Сондай-ақ 80+ кг салмақтағы екінші жартылай финалда Қазақстан атынан Дина Исламбекова Өзбекстан боксшысы Олтина Сотимбоеваға есе жіберді. Енді Аксенова өзбекстандықпен қолғап түйістіреді.
