Грузия астанасы Тбилисиде дзюдодан Grand Slam-2026 халықаралық турнирінде Қазақстан құрамасы жүлде үшін күресін жалғастырып жатыр.
60 келіге дейінгі салмақ дәрежесінде Қазақстан өкілі Талғат Орынбасар қола медаль үшін украиналық Артем Лесюкпен татамиге шықты. Белдесу өте тартысты өтті.
Кездесудің орта тұсында төрешілер видеоқайталаудан кейін алғашқы нәтижелі ұпайды қазақстандық дзюдошының пайдасына берді. Осыдан кейін Талғат Орынбасар басымдығын сақтап, жекпе-жекті жеңіспен аяқтады. Нәтижесінде Grand Slam турнирінің қола жүлдесін еншіледі.
Қазақстандық дзюдошы бұған дейін жартылай финалда Израиль өкілі Ижак Ашпизге есе жіберген. Соның нәтижесінде үшінші орынға таласуға мүмкіндік алды.
Тбилисидегі турнирде Қазақстан атынан тағы бір спортшы алтын жүлде үшін белдеседі. 66 келіге дейінгі салмақта Нұрқанат Серікбаев финалда әзербайжандық Туран Байрамовқа қарсылас атанады.
