Азия чемпионатында қазақстандықтардың екінші жеңілісі тіркелді

Моңғолияның Ұлан-Батыр қаласында өтіп жатқан бокс бойынша Азия чемпионаты-2026 Қазақстан құрамасы үшін сәтсіз жалғасуда.

Элина Базарова алғашқы жекпе-жегінде жеңілді

Қазақстан әйелдер құрамасының өкілі Элина Базарова (54 кг) турнирдегі алғашқы кездесуін өткізді. 1/8 финалда ол Үндістан боксшысы Притимен кездесіп, төрешілердің бірауыздан шешімімен жеңіліп қалды. Қорытынды есеп — 0:5. Осы нәтижеден кейін Прити ширек финалға жолдама алды. Ал Элина Базарова турнирді алғашқы кезеңде аяқтады.

Бұл Қазақстан құрамасы үшін жарыстағы екінші жеңіліс болды.

Айта кетейік, бұған дейін Жазира Орақбаева да алғашқы жекпе-жегінде жарақат алып, жарыстан шығып қалған еді.

Естеріңізге сала кетейік, Азия чемпионаты-2026 Ұлан-Батырда өтіп жатыр. Құрлықтық дода 10 сәуірге дейін жалғасады. Қазақстан атынан жарысқа 20 боксшы барды.