Назым Қызайбай әлем кубогына аттанады
Бокстан Қазақстан әйелдер құрамасының көшбасшысы Назым Қызайбай World Boxing ұйымы ұйымдастыратын әлем кубогының алғашқы кезеңіне қатысу үшін Бразилияға жол тартады.
Соңғы жаттығуын өткізді
Тәжірибелі боксшы әлеуметтік желідегі парақшасында жаттығу барысынан видео жариялап, командамен бірге алдағы сапары жайлы айтты.
Боксшының айтуынша, бұл — Қазақстандағы соңғы жаттығуы:
"Бұрын терлемеген жерім де терледі. Жақсы жүгіріс болды. Қазір жаттығуымды аяқтап жатырмын. Бұл — осындағы соңғы дайындық. Егер бәрі сәтті өтсе, бүгін түнде Бразилияға ұшамыз. Жаттығудан кейін бір “жұлдыз” келеді, соны жаттықтырамын", — деді Қызайбай.
Әлем кубогы Бразилияда өтеді
Айта кетейік, 6–18 сәуір аралығында Қазақстан құрамасы халықаралық оқу-жаттығу жиынын өткізеді. Ал World Boxing әлем кубогының алғашқы кезеңі 20–26 сәуір күндері Бразилияның Фос-ду-Игуасу қаласында ұйымдастырылады.
Қазір турнирге қатысатындардың нақты тізімі ресми түрде жарияланған жоқ.
Еске салсақ, Назым Қызайбайдың соңғы ірі жарысы — 2025 жылдың қыркүйегінде Ливерпульдегі әлем чемпионаты. Ол бұл додада күміс жүлдегер атанды.