Баходир Джалолов Уордли — Дюбуа кешінің андеркардында айқын жеңіске жетті
Өзбекстандық танымал боксшы Манчестер қаласында өткен ірі бокс кешінде кезекті жекпе-жегін өткізді.
Суперауыр салмақта өнер көрсететін Джалолов бұл жолы хорватиялық Агрон Смакичимен қолғап түйістірді. Он раундқа жоспарланған кездесу толық уақытқа созылған жоқ.
Жекпе-жек қалай аяқталды?
Баходир Джалолов айқын басымдық танытып, жетінші раундтан кейін жеңіске жетті. Агрон Смакичи сегізінші раундқа шығудан бас тартып, төрешілер кездесуді тоқтатты.
Осылайша өзбекстандық боксшы кәсіпқой мансабындағы кезекті жеңісін тойлады.
Рекорд жаңарды
Бұл жеңістен кейін Баходир Джалоловтың кәсіпқой бокстағы көрсеткіші 17 жеңіске жетті. Оның көпшілігі нокаутпен аяқталғанын айта кету керек. Ал Агрон Смакичи мансабындағы төртінші жеңілісіне ұшырады.
Кештің басты жекпе-жегі
Манчестердегі бокс кешінің басты оқиғасында британиялық Фабио Уордли мен Даниэль Дюбуа рингке шығады. Олар суперауыр салмақта WBO нұсқасы бойынша әлем чемпионы атағы үшін жұдырықтасады.