2027 жылғы әлем чемпионаты Лас-Вегаста өтетін болды
Күрестен әлем чемпионаты 11-19 қыркүйек аралығында АҚШ-тың Лас-Вегас қаласында өтеді. Бұл жарыста 2028 жылғы Олимпиада ойындарына алғашқы жолдамалар сарапқа салынады.
2027 жылы күрестен әлем чемпионаты АҚШ-та өтеді. United World Wrestling ұйымының мәліметінше, байрақты бәсекені Лас-Вегас қаласы қабылдайды.
Әлем чемпионаты 2027 жылдың 11-19 қыркүйегі аралығында ұйымдастырылады. Бұл турнир тек әлем үздіктерін анықтап қана қоймай, 2028 жылғы Олимпиада ойындарына жолдама беретін алғашқы ірі жарыстардың бірі болады.
Лас-Вегаста Олимпиада лицензиялары сарапқа салынады
United World Wrestling бекіткен ережеге сәйкес, тиісті салмақ дәрежелерінде жүлдегер атанған барлық балуан Олимпиадаға тікелей жолдама алады. Сондықтан Лас-Вегастағы әлем чемпионаты ұлттық құрамалар үшін төртжылдықтың басты додасына апаратын маңызды кезең болмақ.
2028 жылғы жазғы Олимпиада ойындары 14-30 шілде аралығында Лос-Анджелесте өтеді.
2027 жылғы басқа әлем чемпионаттары қайда өтеді?
United World Wrestling 2027 жылы әр жас санаты бойынша өтетін әлем чемпионаттарының қалаларын да жариялады.
- U17 әлем чемпионаты 2-8 тамыз аралығында Иордания астанасы Амманда өтеді.
- U20 әлем чемпионаты 23-29 тамыз күндері Сербияның Нови Сад қаласында ұйымдастырылады.
- U23 әлем чемпионаты 18-24 қазан аралығында Румынияның Брашов қаласында өтеді.