Мұхит Амантаев пен Әнуарбек "Мотиватор" Бекембетовтің жекпе-жегі ресми жарияланды
Екі спортшы жеңіл салмақта IBA Nomad 15 турнирінде кездеседі.
Алматыда жұдырықтасады
Қазақстандық поп-ММА жанкүйерлері үшін қызықты жекпе-жек жарияланды. Танымал бокс бапкері Мұхит Амантаев пен ММА файтері Әнуарбек "Мотиватор" Бекембетов бір октагонда кездеседі.
Жекпе-жек 4 шілде күні Алматыда IBA Nomad 15 турнирі аясында ұйымдастырылады. Қарсыластар жеңіл салмақ дәрежесінде өнер көрсетеді.
Ұзаққа созылған текетірес аяқтала ма?
Ұйымдастырушылар бұл айқасты турнирдің ең тартысты кездесулерінің бірі ретінде бағалап отыр. Себебі екі тараптың арасындағы жанжал мен сөз қақтығысы біраз уақыттан бері жалғасып келеді.
"Екі спортшы да аренада нағыз шоу көрсетіп, ұзаққа созылған қақтығысты аяқтауға дайын", — деп хабарлады Nomad Fighting.
Амантаев соңғы жекпе-жегінде жылдам жеңіске жеткен
Мұхит Амантаев соңғы рет рингке 2026 жылдың 24 қаңтарында шыққан. Ол Өскеменде Steppe Boxing медиа-бокс кешінің басты жекпе-жегінде қырғызстандық Марат Ишеналы уулуға қарсы айқасты.
Бұл кездесуде Амантаев қарсыласын небәрі 50 секундта нокаутқа жіберіп, сенімді жеңіске жетті.
"Мотиватордың" соңғы айқасы қалай аяқталды?
Әнуарбек "Мотиватор" Бекембетов соңғы жекпе-жегін 2024 жылдың қыркүйегінде өткізген. Ол кәсіпқой бокс ережесі бойынша қазақстандық Дастан Бекенмен жұдырықтасқан.
Төрт раундқа созылған кездесуде төрешілер бірауыздан жеңісті Дастан Бекенге берген. Осылайша Бекембетов сол айқаста ұпай санымен жеңіліп қалған еді.
Марсельмен жекпе-жек неге өтпеді?
Сәуір айында өткен IBA Nomad 14 турнирінде Мұхит Амантаев қырғызстандық Марсель Нурланбек уулумен көз арбасқан. Жанкүйерлер олардың Алматыдағы жекпе-жегін күткен еді.
Бірақ кейін Марсель бұл айқасқа ұсынылған гонорардың көңілінен шықпағанын мәлімдеді. Осыдан кейін Амантаевтың келесі қарсыласы ретінде Әнуарбек "Мотиватор" Бекембетов таңдалды.