"Шыбын, дайынсың ба?" — "Мотиватор" Амантаевқа жекпе-жек алдында үн қатты
ММА файтері Әнуарбек "Мотиватор" Бекембетов бокстан жаттықтырушы Мұхит Амантаевпен өтетін жекпе-жегінің ресми жариялануына байланысты пікір білдірді.
Әлеуметтік желідегі жазба
Танымал спортшы Instagram парақшасында алдағы айқастың постерін жариялап, қарсыласына қысқа әрі өткір хабарлама қалдырды.
"Шыбын, дайынсың ба? Менің таңғы асым", — деп жазды Бекембетов смайликпен бірге.
Жекпе-жек қашан өтеді?
Қазақстандық поп-ММА өкілдері арасындағы бұл кездесу 4 шілде күні Алматыда IBA Nomad 15 турнирі аясында ұйымдастырылады. Жекпе-жек жеңіл салмақ дәрежесінде өтеді.
Әнуарбек Бекембетов пен Мұхит Амантаев арасындағы текетірес соңғы уақытта отандық медиа-ММА кеңістігіндегі ең көп талқыланған оқиғалардың біріне айналды.
Қақтығыс қалай басталды?
Бұл жанжал 2025 жылдың басында Казнетте тараған видеодан кейін өрбіді. Бейнежазбада Мұхит Амантаев жаттығу кезінде көмекшісімен қатты спарринг өткізіп, оны рингте бірнеше рет соққының астына алғаны көрінген.
Осыдан кейін Әнуарбек "Мотиватор" Бекембетов Амантаевты қатаң сынға алды. Ол Мұхиттың әрекетін хайп үшін жасалған орынсыз қадам деп бағалап, оны жаңадан келген спортшыны ұрды деп айыптады. Сонымен қатар Бекембетов Амантаевты кәсіпқой бокс ережесі бойынша 10 раундтық жекпе-жекке шақырды.
Амантаевтың жауабы
Мұхит Амантаев та жауапсыз қалмады. Ол арнайы видео жариялап, Бекембетов жағдайдың мән-жайын толық білмейтінін айтты. Амантаевтың сөзінше, видеодағы көмекшісі тәжірибелі 27 жастағы боксшы болған, ал қатты спарринг оқу-жаттығу процесінің бір бөлігі ретінде өткен.
Сондай-ақ ол Бекембетовтің шақыруын қабылдап, оны "хайп қуған спортшы" деп атап, рингте сабақ беруге уәде етті.