Ангелина Лукас Назым Қызайбаймен болған жанжал жайлы ашып айтты
Лукастың айтуынша, ол кейін кек алу немесе қысым көру қаупінен қорқып, ұлттық құрамадан кетуге мәжбүр болған. Осыдан кейін спортшы кәсіпқой бокстағы мансабын өз бетінше құруға кірісті.
Қазақстандық кәсіпқой боксшы, IBO, WBF және WIBF нұсқалары бойынша әлем чемпионы Ангелина Лукас ұлттық құрамадағы кезеңін және Назым Қызайбаймен болған бұрынғы жанжалын еске алды. Лукас бұл туралы блогер Динара Алжанның подкастында айтты.
Лукас әйелдер құрамасындағы жағдайды еске алды
2021 жылдың күзінде Ангелина Лукас Қазақстан әйелдер құрамасындағы "дені дұрыс емес атмосфера" туралы ашық мәлімдеме жасаған еді. Сол кезде ол команда ішінде өзіне қарсы қысым болғанын айтып, бұл жағдай спорттық мансабына әсер еткенін жеткізген.
Боксшының сөзінше, ұлттық құрамадағы ең күрделі кезеңдердің бірі Назым Қызайбаймен бәсеке тұсына сәйкес келген.
"Мені алып тастады деп айтуға болады"
Ангелина Лукас сол кездегі жағдайға қатысты өз нұсқасын айтты. Оның пікірінше, құраманың ішінде бәсеке өте қатты болған және бұл жағдай оның командадан кетуіне әсер еткен.
"Мен финалға дейін жетіп, медаль алып жүрдім. Ал ол сол турнирде медаль ала алмайтын. Екеуміздің арамыздағы бәсеке өте қатты болды. Мені, былайша айтқанда, алып тастады. Себебі оны алға шығарды, өзгелер кедергі жасамасын деді", — деді Лукас.
Боксшы бұған дейін Назым Қызайбайды өзіне қарсы қысым ұйымдастырды, сөз байласты және топ құрды деп айыптаған болатын.
Ангелина Лукас қазір кәсіпқой рингте танымал қазақстандық боксшылардың бірі саналады. Ол бірнеше халықаралық нұсқа бойынша әлем чемпионы атағын жеңіп алған.