Қазақ файтері UFC аңызымен жұдырықтаспақ

Нұрданбек UFC-де өнер көрсеткен

Аралас жекпе-жек жанкүйерлері үшін қызықты айқастардың бірі 8 тамызда Қытай астанасы Бейжіңде өтеді. Naiza Diamond Fight Night турнирінде этникалық қазақ Сайран Нұрданбек тәжірибелі бразилиялық файтер Глейсон Тибаумен кездеседі.

Сайран Нұрданбек кәсіби ММА-да 39 рет жеңіске жетіп, 12 мәрте жеңілген. Ал оның қарсыласы бразилиялық Глейсон Тибаудың кәсіби рекорды — 39 жеңіс және 19 жеңіліс.

Нұрданбек бұған дейін әлемдегі ең ірі ММА промоушені саналатын UFC-де жұдырықтасқан. Оның UFC-дегі көрсеткіші — 3 жеңіс және 3 жеңіліс. Соңғы кәсіби жекпе-жегін ол 2024 жылдың маусым айында өткізді.

Глейсон Тибау – UFC ардагері

Глейсон Тибау ММА жанкүйерлеріне жақсы таныс есім. 43 жастағы файтер UFC-де 2006 жылдан 2018 жылға дейін өнер көрсетті. Осы кезеңде ол әлемдік деңгейдегі бірнеше мықты қарсыласпен кездесті.

Тибаудың мансабындағы ең танымал жекпе-жектердің бірі — Хабиб Нурмагомедовке қарсы айқас. Сонымен қатар бразилиялық файтер Ислам Махачев және Тони Фергюсон секілді атақты файтерлермен де октагонда кездескен.