Дусматов Сәкен Бибосыновпен жұдырықтасуға не кедергі екенін айтты

Дусматов салмақ мәселесіне тоқталды

Өзбек боксшысы Бибосыновпен кездесу мүмкіндігін жоққа шығармайтынын айтты. Бірақ екеуінің салмақ қуу ерекшелігі жекпе-жекті ұйымдастыру кезінде қиындық туғызуы мүмкін.

"Әрине, мұндай жекпе-жек болуы мүмкін. Бірақ бұған дейін бұл тақырыпты ашық талқылаған жоқпыз. Негізгі мәселе — салмақта. Мен 50 келіге дейін салмақ түсіремін, ал ол 52 келіге дейін түседі. Екі келінің өзі қалпына келу кезінде айтарлықтай айырмашылық береді", — деді Дусматов.

Оның сөзінше, салмақ өлшеуден кейін боксшылар келесі тәулікте қайта қалпына келеді. Сондықтан жекпе-жек күні олардың нақты салмақтары арасында едәуір айырмашылық болуы ықтимал.

Соған қарамастан Дусматов кейбір халықаралық лигаларда екеуінің бір салмақ дәрежесінде өнер көрсету мүмкіндігі бар екенін атап өтті.

"Жапониядағы лигада біз бір дивизионда өнер көрсете аламыз. Ол 52 келіге, мен 50 келіге салмақ түсіремін. Сондықтан болашақта бұл жекпе-жек өтуі әбден мүмкін", — деді өзбекстандық боксшы.

Дусматов пен Бибосынов төрт рет кездескен

Хасанбой Дусматов пен Сәкен Бибосынов бұған дейін рингте төрт рет қолғап түйістірген. Қазіргі есеп — өзбекстандық боксшының пайдасына 3:1.

Бибосынов қарсыласын алғаш рет 2021 жылы Белградта өткен әлем чемпионатында жеңген. Одан кейін Дусматов қатарынан үш кездесуде басым түсті:

• Амманда өткен Азия чемпионатының финалында;
• Ханчжоудағы 2023 жылғы Азия ойындарында;
• Париж Олимпиадасы-2024 ширек финалында.

Осылайша екі боксшы арасындағы бесінші жекпе-жек ұйымдастырылса, ол Қазақстан мен Өзбекстан бокс жанкүйерлері үшін үлкен қызығушылық тудыруы мүмкін.