Астанадағы үлкен бокс кеші: Тәшкенбай, Бибосынов және Еркебұлан Тоқтар рингке шығады

Тәшкенбай IBF Asia белбеуіне таласады

Халықаралық бокс күніне арналған IBA Nomad турнирі елордадағы Жақсылық Үшкемпіров атындағы Жекпе-жек сарайында өтеді.

Кештің басты жекпе-жегінде әлем чемпионы Санжар Тәшкенбай филиппиндік Нил Хакамоспен кездеседі. Қос боксшы бірінші аса жеңіл салмақтағы IBF Asia ұйымының бос тұрған чемпиондық белбеуін сарапқа салады.

Бұл кездесу қазақстандық боксшының кәсіпқой рингтегі маңызды сынақтарының біріне айналмақ.

Қазақстандық екі боксшы IBA Nomad белбеуін сарапқа салады

Кеш аясында тағы бір чемпиондық айқас өтеді.

Айдос Жаппарбергенов пен Алмаз Нұрғали жеңіл салмақтағы IBA Nomad чемпиондық белбеуі үшін жұдырықтасады. Осылайша Астанадағы турнирде кемінде екі титулдық жекпе-жек өтеді.

Еркебұлан Тоқтар кәсіпқой бокс ережесімен жұдырықтасады

ММА жанкүйерлеріне жақсы таныс Еркебұлан Тоқтар да турнир кардына енді. Ол өзбекстандық Бобиржон “Испанчик” Исроиловпен кездеседі.

Жекпе-жек кәсіпқой бокс ережесі бойынша супер орта салмақта өтеді. Бұл айқас кештегі ең көп қызығушылық тудыратын кездесулердің бірі болуы мүмкін.

Бибосынов намибиялық боксшымен кездеседі

Токио Олимпиадасының қола жүлдегері Сәкен Бибосынов та IBA Nomad кешінде шаршы алаңға шығады. Оның қарсыласы – Намибия өкілі, 34 жастағы Иммануэль Йозеф.

Бибосынов әуесқой бокстағы жоғары деңгейдегі тәжірибесімен танымал. Сондықтан оның Астанадағы жекпе-жегі де жанкүйерлер назарында болмақ.