"Бұл – үлкен қадам": Бапкер Тәшкенбай мен Бибосыновтың алдағы айқасына баға берді

Қазақстандық тәжірибелі бокс бапкері Мирамғали Ақмолдинов Санжар Тәшкенбай мен Сәкен Бибосыновтың IBA Nomad лигасы ұйымдастыратын International Boxing Day турниріндегі жекпе-жектеріне баға берді.

Маманның пікірінше, екі танымал қазақстандық боксшының кәсіпқой рингте өнер көрсетуі олардың мансабындағы маңызды кезеңдердің бірі болмақ.

"Бұл – олардың мансабындағы үлкен қадам"

Ақмолдинов Тәшкенбай мен Бибосыновтың қатысуының өзі турнирге деген қызығушылықты арттыратынын атап өтті.

"Сәкен мен Санжар секілді жұлдыздардың бұл турнирге қатысуы жарысты алдын ала-ақ тартымды етіп отыр. Өйткені олар – Қазақстандағы бокс жанкүйерлерінің сүйікті спортшылары. Бұл олардың спорттық мансабы үшін де үлкен қадам", – деді бапкер Sports.kz басылымына берген сұхбатында.

Мирамғали Ақмолдиновтың айтуынша, үлкен аренада мыңдаған жанкүйердің алдында жұдырықтасу кез келген спортшыға бұйыра бермейтін мүмкіндік.

"Көп көрермен жиналған аренада өнер көрсету – еліміздегі әр боксшыға беріле бермейтін тәжірибе. Меніңше, жанкүйерлерге бұл спортшылардың кәсіпқой бокста қалай жұдырықтасатынын көру қызық болады", – деді маман.

Турнир Астанада өтеді

International Boxing Day турнирі Астанадағы Жақсылық Үшкемпіров атындағы Жекпе-жек сарайында өтеді.