Еркебұлан Тоқтар өзбекстандық "Ханзаданы" ауыр нокаутқа түсірді

Алғашқы раундта үш нокдаун тіркелді

Кәсіпқой рингтегі тәжірибелері аса көп болмағанына қарамастан екеуі де жекпе-жекті жоғары қарқында бастады. Бірінші раундта қарсыластар ашық айқасқа көшіп, бір-бірін нокдаунға түсірді.

Исроилов екі рет еденге құласа, Еркебұлан Тоқтар да қарсыласының соққысынан кейін бір мәрте нокдаун алды.

Жекпе-жек екінші раундта аяқталды

Екінші раундта қазақстандық боксшы басымдықты толықтай өз қолына алды. Тоқтар қарсыласын тағы екі рет нокдаунға жіберіп, артынша шабуылын ауыр соққымен түйіндеді.

Исроилов жойқын соққыдан кейін айқасты жалғастыра алмады. Төреші кездесуді тоқтатып, Еркебұлан Тоқтардың нокаутпен жеңіске жеткенін жариялады.

Қазақстандық файтер бұған дейін кәсіпқой бокс шаршы алаңына 2025 жылдың желтоқсанында шыққан. Сол кездесуде 9-2-2 көрсеткіші бар Тимур Никулинді бірінші раундта нокаутқа түсірді.

Бобиржон Исроилов та соңғы жекпе-жегін желтоқсанда өткізген. Ол отандасы Сирожиддин Уразалиевті алғашқы раундта мерзімінен бұрын жеңген.