Болат Сақаев күрестен ӘЧ қола медаліне таласу мүмкіндігін сақтап қалды
Астанада күрестен әлем чемпионатында Болат Сақаев жұбаныш белдесулеріне қатысатын болды. Ал Санжар Досжанов жарысты мерзімінен бұрын аяқтады.
Сақаевқа тағы бір мүмкіндік берілді
Еркін күрестен 86 келіге дейінгі салмақ дәрежесінде бақ сынап жатқан Болат Сақаев әлем чемпионатында америкалық танымал балуан Кайл Дейктен жеңілген болатын.
Дегенмен қазақстандықтың жүлдеге таласу мүмкіндігі сақталып қалды. Себебі Кайл Дейк жартылай финалда ресейлік Ибрагим Кадиевті жеңіп, финалға жолдама алды.
Осы нәтижеден кейін Болат Сақаев жұбаныш белдесулеріне қатысу құқығына ие болды.
Қола медаль үшін кімдермен күреседі?
Қазақстандық балуан 31 қазанда кілемге қайта шығады. Оның алғашқы қарсыласы моңғолиялық Батбилгун Надамбат пен литвалық Паулиус Лескаускас арасындағы кездесудің жеңімпазы болады.
Егер Сақаев алғашқы белдесуде басым түссе, келесі айналымда қырғызстандық Малик Шаваевпен кездеседі. Тек осы екі қарсыласын жеңген жағдайда әлем чемпионатының қола медалі үшін өтетін шешуші белдесуге жолдама алады.
Болат Сақаев туралы не белгілі?
33 жастағы Болат Сақаев Атырау облысының намысын қорғайды. Ол халықаралық жарыстарда бірнеше мәрте жүлдегер атанған тәжірибелі балуан.
Негізгі жетістіктері:
2013 жыл – жасөспірімдер арасындағы Азия чемпионы;
2016 жыл – студенттер арасындағы әлем чемпионатының қола жүлдегері;
2017 жыл – Ислам ынтымақтастығы ойындарының қола жүлдегері;
2023 жыл – Азия чемпионы;
2024 жыл – Дінмұхамед Қонаевты еске алуға арналған халықаралық турнирдің жеңімпазы;
2025 жыл – Азия чемпионатының күміс жүлдегері;
2026 жыл – "Ulaanbaatar Open" рейтингтік турнирінің қола жүлдегері.
Болат Сақаев – Қазақстанның халықаралық дәрежедегі спорт шебері. Қазіргі уақытта ол әлемдік рейтингте 10-орында тұр.
Досжанов әлем чемпионатындағы күресін аяқтады
Ал 70 келіге дейінгі салмақта ел намысын қорғаған Санжар Досжанов үшін Астанадағы әлем чемпионаты аяқталды.
26 жастағы қазақстандық балуан 1/8 финалда моңғолиялық Тулга Тимур-Очирге есе жіберген еді.
Досжановтың жұбаныш белдесулеріне қатысуы қарсыласының финалға шығуына байланысты болатын. Алайда моңғолиялық балуан ресейлік Ибрагим Ибрагимовтен жеңіліп, алтын медаль үшін күрестен шет қалды.