Қазақстанда UFC турнирі өтуі мүмкін: Министр мәлімдеме жасады
Министрдің мәлімдемесіне сәйкес, келіссөздердің нәтижесі мен ықтимал мерзімдер туралы ресми ақпарат қараша айының соңында белгілі болуы мүмкін.
Қазақстанда UFC турнирін өткізу жөніндегі келіссөздер жалғасып жатыр. Бұл мәселе бойынша нақты қорытынды қараша айының соңында жариялануы мүмкін.
Туризм және спорт министрі Ербол Мырзабосыновтың айтуынша, Қазақстан тарапы UFC өкілдерімен 2027–2028 жылдары турнир ұйымдастыру мүмкіндігін талқылап жатыр.
UFC өкілдерімен бірнеше кездесу өткен
Министрдің мәліметінше, 2026 жылдың басынан бері UFC өкілдерімен бірнеше жұмыс кездесуі ұйымдастырылған.
Қазір тараптар Қазақстанда ұйымның ірі турнирін өткізуге қатысты келіссөздерді жалғастырып жатыр.
"Келіссөздер белсенді жүріп жатыр. Ай соңында 2027–2028 жылдары UFC өткізу мәселесі бойынша қандай шешімге келгенімізді толығырақ айтамыз. Барлық жұмыс атқарылды, ай соңында қорытындысын хабарлаймыз", – деді Ербол Мырзабосынов Орталық коммуникациялар қызметіндегі брифингте.
Нақты шешім әлі жарияланған жоқ
Әзірге Қазақстанда UFC турнирінің өтетіні ресми түрде бекітілген жоқ.
Министрдің мәлімдемесіне сәйкес, келіссөздердің нәтижесі мен ықтимал мерзімдер туралы ресми ақпарат қараша айының соңында белгілі болуы мүмкін.
Бұған дейін UFC президенті Дана Уайт ұйымның Қазақстанда турнир өткізу жоспары бар екенін мәлімдеген.