Боксшымыз финалдық айқаста қарсыласын айқын басымдықпен жеңді.
Таиландта бокстан ерлер арасында өтіп жатқан Азия біріншілігінде Қазақстан құрамасы атынан соңғы болып Айбек Оралбай өнер көрсетті.
92+ келі салмақта жұдырықтасатын боксшымыз финалдық айқаста қытайлық Абудурешити Ремуламен қолғап түйістірді.
Бірінші раундта бес төрешінің бәрі қазақстандық боксшыны басым деп тапты. Екінші кезең де Айбектің жеңісімен аяқталды. Жекпе-жек қорытындысында Айбек Оралбай төрешілердің бірауыздан шешімімен жеңімпаз деп танылды.
Осылайша, Қазақстан құрамасының қоржыны тағы бір алтын медальмен толықты. Жалпы, ерлер командасы сары құрлық біріншілігін 4 алтын, 5 күміс, 1 қоламен аяқтады.
