Мексикалық боксшы Сауль "Канело" Альварес (62-2-2, 39 КО) мамырда америкалық Теренс Кроуфордпен (41-0, 31 КО) жұдырықтасады.
Жекпе-жек 3 мамыр күні Лас-Вегаста (АҚШ, Невада штаты) мексикалықтардың ”Синко де майо” дәстүрлі мерекесінде өтеді. Бокс кешін Сауд Арабиясының Бас ойын-сауық басқармасының төрағасы Турки Аль аш-Шейх ұйымдастырады.
Сауль Альварес өзінің соңғы жекпе-жегін қыркүйекте өткізді. Сол кезде төрешілер оны бірауыздан пуэрториколық боксшы Эдгар Берлангадан (22-1, 17 КО) басым түсті деп шешті. Ал Теренс Кроуфорд тамызда дәл осындай шешіммен өзбек Исраил Мадримовты (10-1-1, 7 КО) жеңді.
