Бүгін Baku Grand Slam турнирінің соңғы күнінде қазақстандық дзюдошылар 90, 100 және 100+ кг салмақ дәрежелерінде бақ сынады.
Елге жалғыз жүлдені Ерасыл Қажыбаев алып берді. Ол грузиялық Саба Инаниешвилиді сенімді жеңіп, турнирдің қола жүлдесін місе тұтты. Қажыбаев бұған дейін түркиялық Ибрахим Татароғлыны да айқын басымдықпен ұтқан еді.
30 жастағы қазақстандық үшін бұл Grand Slam сериясындағы екінші жүлдесі.
Сонымен қатар, турнирде Дидар Хамза (90 кг) және Ислам Бозбаев (100 кг) өнер көрсетті. Дидар Хамза жапондық Санширо Мураодан жеңіліп жарысты ерте аяқтаса, Ислам Бозбаев жұбаныш белдесуінде ресейлік Мұхамед-Али Матаевқа есе жіберіп, қола медаль үшін күреске өте алмады.
