Қазақстанның үздік дзюдошысы ТОП-турнирдің жартылай финалына шықты

Бірінші жекпе-жек – жапониялық Мизуки Харадаға қарсы татамиге шыққан Әбужақынова қарсыласынан "юко" және "иппон" әдістерімен басым түсті. 

Екінші жекпе-жекте турнир қожайыны австриялық Жаклин Шпрингерге қарсы тұрды. Қарсыласы үш рет "шидо" алып, жеңіс қазақ спортшысына бұйырды.

Осылайша топ-турнирдің басты фавориттерінің бірі саналатын Әбиба Әбужақынова жартылай финалға жолдама алды.

Бұл гран-при кезеңі Әбиба Әбужақынова үшін 2025 жылғы алғашқы халықаралық жарыс болып табылады.

Әбиба Әбужақынованың спорттық жетістіктері: 

• туған жылы: 4 шілде 1997 жыл
• туған жері: Ташкент, Өзбекстан
• Қазақстан азаматтығын 2016 жылдан бері иеленген
• әлемдік рейтингтегі орны: 5-орын (4674 ұпай)
• Азия чемпионатының екі дүркін финалисі (2021, 2022)
• Әлем чемпионатының екі мәрте қола жүлдегері (2022, 2024)
• "Үлкен дулыға" турнирінің жеті дүркін қола жүлдегері (2022, 2023, 2024)
• Гран-при кезеңінің жеңімпазы (2023)
• Азиада-2023 финалисі
• "Үлкен дулыға" кезеңінің финалисі (2024)
• ҚР еңбек сіңірген спорт шебері
• Халықаралық дәрежедегі спорт шебері
• Париж-2024 Олимпиадасының қатысушысы (5-орын)

Өкінішке қарай, 52 кг салмақтағы Толғанай Әбеуова мен 57 кг салмақтағы Дана Әбдірова турнирдің бірінші айналымында жарыс жолынан шығып қалды. Олар Сербия және Хорватия спортшыларына қарсы "вазари" ұпайымен ұтылды.