Әлемдік рейтингте отандасымыз үздік 6 боксшы қатарына енді.
Қазақстандық кәсіпқой боксшы Ангелина Лукас BoxRec+ әлемдік рейтингінде 6-орынға көтерілді. Бұл ел тарихында бұрын-соңды болмаған жетістік.
Ангелина өзінің әлеуметтік желідегі парақшасында қуанышты жаңалығымен бөлісіп, бұл нәтижеге жету жолы оңай болмағанын жеткізді:
«Әлемдік рейтингте 6-шы орынға шықтым. Бұл – Қазақстан әйелдер кәсіпқой боксындағы алғашқы оқиға», – деп жазды спортшы.
Бұдан бөлек, былғары қолғап шебері жуырда Гиннес рекордттар кітабына енуі мүмкін екенін тілге тиек етті. Себебі отандасымыз 21 күнде қатарынан 3 жекпе-жек өткізген.
2024 жылдың басында Ангелина Лукас «IBA чемпиондар түні» аясында нигериялық Айисат Орийомимен жекпе-жек өткізіп, сенімді жеңіске жеткен болатын.
Бұл жеңіс рейтингке әсер етіп, Ангелинаның кәсіби жолында үлкен серпіліс болды.
BoxRec+ – кәсіпқой боксшылардың әлемдік рейтингісін анықтайтын беделді платформа. Мұнда тек жекпе-жек нәтижелері ғана емес, қарсыластардың деңгейі мен мансап траекториясы да есепке алынады.
Айта кетейік, Ангелина Лукас бүгінгі таңда Қазақстанның кәсіпқой бокстағы әйелдер арасындағы ең жоғары нәтижеге қол жеткізген боксшысы атанды. Бұл жетістік тек жеке жеңіс емес, қазақ әйелдер боксының халықаралық деңгейдегі беделінің артуы.
