Қазақстандық боксшы Жазира Орақбаева Бразилияның Фос-ду-Игуасу қаласында өтіп жатқан бокстан әлем кубогында финалға жолдама алды.
Әйелдер арасындағы 51 келі салмақ дәрежесінде өнер көрсететін Жазира Орақбаева жартылай финалда Польшаның талантты боксшысы Наталия Кучевскамен кездесті. Тартысты өткен жекпе-жекте қазақстандық спортшы төрешілер шешімімен жеңіске жетті.
Осылайша Орақбаева әлем кубогының шешуші кезеңінде алтын медаль үшін таласады. Ал Кучевска турнирді қола жүлдемен аяқтады.
Жазира бұған дейін Азия чемпионатының екі дүркін қола жүлдегері атанған. Ол халықаралық ареналарда тәжірибе жинап, өзін сенімді көрсетіп келеді.
Ал Наталия Кучевска – жастар арасындағы әлем чемпионатының күміс жүлдегері және Еуропа чемпионатының үш дүркін жүлдегері (бір күміс, екі қола).
