Олимпиада чемпионы TKO Boxing аясында жекпе-жекке жазда шығады.
Қазақстандық кәсіпқой боксшы, 2016 жылғы Олимпиада чемпионы Данияр Елеусінов өзінің жаңа жобадағы дебюті туралы мәлімдеді. Ол UFC президенті Дана Уайттың қатысуымен құрылған TKO Boxing лигасында өнер көрсетпек.
“Жекпе-жек жаз мезгілінде жоспарланып отыр. Ресми ақпарат бойынша қыркүйекте басталады. Бірақ бейресми дерек бойынша, жекпе-жектер шілдеде-ақ өтуі мүмкін, мен сол кардта боламын”, — деді Данияр Елеусінов.
Данияр жаңа промоушенмен келісімшартқа отырып, қомақты гонорар мен рейтингілік жетістіктер үшін бонус алуға мүмкіндік алды. Егер ол титулын қорғай алса, 750 000 АҚШ долларына дейін табыс табуы мүмкін. Сонымен қатар лига әр спортшыға бес ай сайын кем дегенде бір жекпе-жек өткізуді кепілдейді.
TKO Boxing лигасы 2025 жылдың 5 наурызында таныстырылды. Жоба авторлары — UFC басшысы Дана Уайт пен Сауд Арабиясы ойын-сауық басқармасының төрағасы Турки әл аш-Шейх. Лига “ең мықтысы ең мықтысына қарсы” қағидасы бойынша UFC жүйесіне ұқсас рейтингтік жүйемен жұмыс істейді.
Айта кетейік, Данияр Елеусінов — тек Олимпиада чемпионы емес, қазір IBO тұжырымы бойынша жартылай орта салмақтағы әлем чемпионы саналады.
