Team Vitality командасының капитанына жуырда бапкерлік қызметке қатысты сұрақ қойылған болатын.
Атақты Team Vitality командасының CS2 бойынша капитаны Дан apEX Мадесклер кәсіби ойыншы ретіндегі мансабын аяқтағаннан кейінгі өмірі туралы оймен бөлісті. Оның айтуынша, салада бапкер болып қалуы екіталай. Бұл туралы apEX ESL Counter-Strike YouTube-арнасында жарияланған подкастта айтты.
Подкаст барысында apEX-ке мансабын аяқтаған соң бапкер болу жоспары бар-жоғы жөнінде сұрақ қойылды. Ойыншы бұл нұсқаны күмәнмен қабылдайтынын жасырмады.
"Бұл сол баяғы өмірді қайта жалғастыру деген сөз емес пе? Мені жайыма қалдырыңдар. Әңгіме ақшада да емес. Мүмкін, сол ақшаны жұмсап, өмірден ләззат алатын уақыт керек шығар. Мен жай ғана өмірден рахат алғым келеді. Сондықтан бапкер болатыныма сенімді емеспін, өйткені ол кезде өмірім мүлде өзгермейді", — деді apEX.
Айта кетейік, Дан apEX Мадесклер қазір Team Vitality сапында капитан қызметін атқарып, командамен бірге халықаралық турнирлерде жоғары нәтижелер көрсетіп жүр. Ол CS сахнасындағы ең тәжірибелі әрі беделді ойыншылардың бірі саналады.
