Ағылшынның әйгілі «Ливерпуль» клубы Италияның «Парма» командасынан 18 жастағы орталық қорғаушы Джованни Леониді жақын арада сапына қоспақ. Бұл ақпаратты мерсисайдтықтардың бас бапкері Арне Слот растады.
Арне Слоттың айтуынша, клубтар трансфер бойынша келісімге келген, алайда футболшы әлі жеке келісімшартқа қол қойған жоқ:
«Клубтар келісімге келді, бірақ ол әлі бізбен контрактқа қол қойған жоқ. Қол қойылған соң, қосымша мәлімет бере аламын», — деді Слот.
Трансфер сомасы 26 миллион фунт стерлингті (шамамен 35 млн еуро) құрайды. Сонымен қатар, «Парма» болашақтағы қайта сатудан да үлес алады.
Айта кетерлігі, бар болғаны бір жыл бұрын Леони «Сампдориядан» «Пармаға» небәрі 5 млн еуроға ауысқан еді — бұл қазіргі бағадан жеті есе арзан.
Өткен маусымда Джованни Леони Серия А аясында 17 ойын өткізіп, 1 гол соқты. Орта есеппен әр матчта шамамен 70 минут алаңда болды. Қорғаныстағы сенімді ойыны мен жасына қарамастан сабырлы шешімдері оның әлеуетін айқын көрсетеді.
2023 жылы Liverpool Echo басылымына берген сұхбатында Леони өзінің кумирлерін атаған:
«Мен Вирджил ван Дейк пен Крис Смоллингтен шабыт аламын», — деген еді Леони.
Ван Дейк қазіргі «Ливерпуль» қорғанысының тірегі болса, Смоллинг сол кезде «Рома» сапында өнер көрсеткен.
Атақты италиялық бапкер Арриго Саки жас қорғаушыны ұлттық құраманың болашағы деп санайды. Gazzetta dello Sport үшін жазған мақаласында ол:
«Мен сенімдімін, ол «адзурри» қорғанысының негізгі тірегіне айналады», — деп баға берген.
Бұл трансфер ағылшын клубының жазғы ауысымдардағы шығындарын одан әрі арттырды. Қазіргі трансферлік терезеде мерсисайдтықтар ойыншыларды сатып алуға 328,68 млн еуро жұмсады. Салыстыру үшін, Испанияның үш алпауыты — «Реал Мадрид», «Барселона» және «Атлетико Мадрид» бірге небәрі 38,82 млн еуроға артық шығындалған.
Жас әрі дарынды Леонидің келуі «Ливерпуль» қорғанысын ұзақ жылдарға күшейтуі мүмкін. Жанкүйерлер оның Англия Премьер-лигасындағы алғашқы қадамдарын асыға күтуде.
