Қазақстандық жас қақпашысы Еуропа скауттарының назарына ілікті.
Бұл туралы испаниялық сарапшы әрі Marca басылымының журналисі Давид Руис мәлімдеді.
“Скауттар «Қайрат» ойыншыларын «Селтикке» дейін-ақ бақылап жүргені анық. Ал Чемпиондар лигасының негізгі кезеңі — мүлде басқа деңгей. Сондықтан Шерханның осындай ойынынан кейін оған Еуропаның үздік чемпионаттарынан, соның ішінде Ла Лига клубтарынан қызығушылық болуы заңды. Ол — тамаша деректері бар қақпашы. Оның жасы небәрі 18-де ғана”, — деді аналитик.
Айта кетейік, «Қайраттың» түлегі Шерхан Қалмырза Чемпиондар лигасының топтық кезеңіндегі алғашқы турда «Спортингке» қарсы матчта (1:4) пенальтиді қайтарып, жанкүйерлерді тәнті етті. Бұл оның ересектер арасындағы бар-жоғы екінші ойыны болатын.
Transfermarkt дерегіне сәйкес, жас қақпашының қазіргі трансферлік бағасы 200 мың еуро деп көрсетілген.
