Португалиялық маманның тағдыры «Сандерлендке» қарсы матч нәтижесіне тікелей байланысты.
Ағылшын футболының алып клубы «Манчестер Юнайтед» тағы да үлкен сынақ алдында тұр. Егер команда алдағы турда «Сандерлендтен» жеңілсе, бас бапкер Рубен Аморим қызметінен айырылуы ықтимал.
The Telegraph дерегінше, «Юнайтед» басшылығы 40 жастағы португал маманның болашағын тікелей осы матч нәтижесіне байлап отыр. Клуб соңғы шешімді 4 қазанда өтетін ойыннан кейін қабылдайды.
Премьер-лиганың алты турынан кейін «Манчестер Юнайтед» небәрі 7 ұпай жинап, 14-орында тұр. Бұл – клуб тарихындағы ең әлсіз старттардың бірі. Жанкүйерлер ашулы, ал баспасөз Аморимнің тактикасына күмән келтіруде.
Жазғы трансферлерге көп үміт артылғанымен, команда ойын сапасын арттыра алмай келеді. Шабуылда өткірлік жетіспейді, ал қорғаныс жиі қателікке бой алдырады. Фанаттар «Аморимнің стилі АПЛ-ге сәйкес келмеді ме?» деген сауалды жиі қояды.
Егер «Сандерлендке» қарсы матчта тағы да ұпай жоғалтса, клуб басшылығы жедел түрде жаңа бапкер іздеуге кірісуі мүмкін. Қазірдің өзінде баспасөзде тәжірибелі мамандардың есімі аталып жатыр.
