қайта оралады: Екі жылдан астам үзілістен кейін француз жұлдызы Поль Погба жуырда Монако сапындағы дебютін өткізбек
Француз жұлдызы, жартылай қорғаушы Поль Погба екі жылдан кейін қайта алаңға оралуға жақын. AS Monaco бапкері Себастьен Поконьоли оның құрамға қосылуына аз-ақ қалғанын айтты. Бірақ жанкүйерлерге «шамадан тыс үміт артпауға» кеңес берді.
Футбол әлемінің ең жарқын жұлдыздарының бірі соңғы рет ресми матчты 2023 жылдың қыркүйегінде өткізген болатын. Одан кейін допинг дауына байланысты төрт жылға спорттан шеттетілді, бірақ CAS (Спорт арбитраж соты) апелляцияны қарап, жазаны 18 айға дейін қысқартқан еді.
Жаздың басында Погба еркін агент ретінде «Монакомен» келісімшартқа отырды. Клубтың бас бапкері Себастьен Поконьоли футболшының жағдайын оң бағалап, оның тез арада алаңға шығуы мүмкін екенін мәлімдеді:
«Қазір бәрі жақсы жүріп жатыр. Ол жақын уақытта команда құрамына қосылады деп ойлаймын. Бірақ біз асықпауымыз керек — Погбаны қазіргі физикалық және психологиялық жағдайына қарай бағалауымыз қажет», — деді бапкер.
Поконьолидің айтуынша, қазіргі Погба — бұрынғыдан өзгеше ойыншы.
«Манчестер Юнайтед немесе алғашқы “Ювентус” кезіндегі Поль Погба — ол басқа кезеңнің ойыншысы. Әр футболшы жасы мен тәжірибесіне қарай өзгереді. Біз оны сол тұрғыдан бағалаймыз», — деді ол.
Дегенмен бапкер Погбаның техникасы мен пас беру мәдениеті бұрынғыша жоғары екенін атап өтті.
«Ол әлі де ерекше техникаға ие. Матч ырғағы оның формасын айқындайды. Менің мақсатым — оны өз мүмкіндігінің ең жоғары деңгейіне жеткізу», — деді Поконьоли.
Погба қазір 32 жаста, ал «Монако» Франция чемпионатында 6-орында келеді. Сәрсенбі күні «Монако» «Нантпен» кездеседі, ал Погба сол матчқа құрамға енуі мүмкін деген болжам бар.
