Бұл туралы Hearts Standard журналистері Крейг Кейрнс пен Джоэл Скед пікір білдірді.
Қазақстан құрамасының вингері Ислам Чесноковтың шотландиялық «Хартс» клубы сапындағы алғашқы ойыны жақын күндері өтуі мүмкін. Бұл туралы Hearts Standard журналистері Крейг Кейрнс пен Джоэл Скед пікір білдірді.
Журналистердің сөзінше, Чесноков 11 қаңтарда Шотландия чемпионаты аясында өтетін «Дандиге» қарсы ойында алаңға шығуы мүмкін.
Джоэл Скед бұл жөнінде былай дейді:
«Бапкердің Чесноковты мүмкіндігінше тезірек ойынға қосуды қалайтыны байқалады. Бірақ оның қарашадан бері ресми матч өткізбегенін де ескеру қажет. Соған қарамастан, клуб оған трансферді күтіп жүрген кезеңде жеке дайындық бағдарламасын жасап берген. Менің ойымша, ол осы демалыс күндері „Денс Парк“ стадионында дебют жасайды», — деді Скед.
Крейг Кейрнс те әріптесінің пікірін қолдады:
«Иә, мен де оның дебюті болады деп ойлаймын. Тіпті ойын соңына қарай қосалқы құрамнан алаңға шығуы әбден мүмкін», — деп қосты ол.
Еске сала кетейік, Ислам Чесноков «Хартсқа» қостанайлық «Тобылдан» еркін агент ретінде ауысқан. Қазіргі таңда ол жаңа командасына бейімделу кезеңінен өтіп жатыр.
