Астанадағы UEFA Суперкубогының билет бағасы қанша тұратыны айтылды

2028 жылы Астанада өтетін UEFA Суперкубогының билет бағасына қатысты алғашқы ақпарат пайда болды. Бұған дейін бұл матчтың "Астана Аренада" өтетіні ресми түрде жарияланған еді. 

ASnews.kz мәліметінше, 2028 жылғы ойынның нақты билет бағасы әлі жарияланған жоқ. Дегенмен 2026 жылы Зальцбургте өткен UEFA Суперкубогының бағалары шамамен қандай диапазон болуы мүмкін екенін көрсетеді.

Сол кездегі ресми бағалар:

• Fans First – 30 еуро (шамамен 15 300 теңге)
• 3-санат – 50 еуро (шамамен 25 500 теңге)
• 2-санат – 90 еуро (шамамен 45 900 теңге)
• 1-санат – 150 еуро (шамамен 76 500 теңге)
• Prime Seats – 350 еуро (шамамен 178 500 теңге)

Fans First санаты финалға шыққан клубтардың жанкүйерлеріне арналған арнайы квота ретінде ұсынылды.

Билет бағасын Қазақстан тарапы белгілемейді

Астанадағы матчқа билет құнын қабылдаушы тарап өз бетінше бекітпейді.

UEFA Суперкубогында баға саясаты мен сату процесін толықтай UEFA басқарады. Қазақстан тарапы негізінен стадионды дайындау мен ұйымдастыру жұмыстарына жауап береді. Сондықтан 2028 жылғы матчта да билет құны UEFA бекіткен бірыңғай жүйе бойынша қалыптасады деп күтіледі.

Жалпы жанкүйерлерге арналған билеттер UEFA-ның ресми сайты арқылы сатылуы тиіс. Ал финалға шыққан екі клубтың жанкүйерлеріне бөлінетін квоталарды сол командалардың өздері таратады. Осы себепті делдалдар немесе жергілікті клубтар билет бағасын өз қалауынша өзгерте алмайды.

2025 жылғы "Қайрат" билеттерімен салыстыру

Қазақстандық жанкүйерлер 2025 жылы "Қайрат" Чемпиондар лигасының негізгі кезеңіне шыққан кезде Алматыдағы матчтарға билет бағасы 30 мыңнан 250 мың теңгеге дейін жеткенін жақсы біледі. Алайда UEFA Суперкубогында баға саясаты тікелей UEFA бақылауында болғандықтан, Астанадағы матчта да жеке ұйымдастырушылардың бағаны еркін көтеру мүмкіндігі болмайды.

Айта кетейік, 2028 жылғы UEFA Суперкубогының ресми билет бағасы әзірге бекітілген жоқ. Сондықтан Зальцбургтегі 30-350 еуро аралығындағы диапазон тек бағдар ретінде қарастырылуы керек. Нақты құн матчқа жақындағанда UEFA тарапынан жарияланады.