Каннаваро Өзбекстан құрамасына "Челсиде" жұмыс істеген маманды шақырды
Футболдан Өзбекстан құрамасының бас бапкері Фабио Каннавароның штабына Италиядан екі тәжірибелі маман қосылды.
Каннавароның штабы екі маманмен толықты
Өзбекстан футбол қауымдастығының мәліметінше, ұлттық командада физиотерапевт Сильвано Котти мен спорттық нутрициолог Андреа Иулиано жұмыс істейтін болады.
Сильвано Котти кәсіби футболда мол тәжірибе жинаған. Ол бұған дейін "Интер", "Милан" және "Рома" клубтарында, сондай-ақ Англияның "Челси" командасында физиотерапевт қызметін атқарған. Бұдан бөлек, маман Италия құрамасының бапкерлер штабына да кірген.
Спорттық тамақтануға жауапты маман шақырылды
Андреа Иулиано спорттық нутрициология саласына маманданған. Ол бұрын "Удинезе" клубында және Швейцарияның 21 жасқа дейінгі құрамасында еңбек еткен.
Жаңа маман футболшылардың тамақтану тәртібін қадағалап, жаттығулар мен матчтардан кейінгі ағзаны қалпына келтіру үдерісіне көмектеседі.
Өзбекстан үш жолдастық матч өткізеді
Фабио Каннаваро жаттықтыратын Өзбекстан құрамасы 21 қыркүйекте кезекті оқу-жаттығу жиынын бастады. Жиын аясында команда үш жолдастық кездесуін өткізеді:
- 24 қыркүйек — Иран;
- 1 қазан — Сирия;
- 6 қазан — Оңтүстік Корея.
Бұл кездесулер ұлттық команданың алдағы ресми турнирлерге дайындығын пысықтауға мүмкіндік береді.