Футбол ма, фан-зона ма? Әлемдік әншілердің шоуынан спортшыларымыз стадионсыз қалмай ма?

Жуырда атақты әнші Дженнифер Лопес 1 тамызда "Астана Аренада" концерт өткізетіні белгілі болды. Бұл шоу — әлемдік тур аясындағы ірі мәдени шаралардың бірі. Алайда бұл Еурокубок іріктеу ойындары мен Қазақстан премьер-лигасының (ҚПЛ) ресми матчтарына әсер етуі мүмкін. 

Стадион – спортқа ма, шоуға ма?

Жуырда аталған концерттің продюсері Мәлік Хасенов алдағы үш жылда Қазақстанда тағы 10 әлемдік жұлдыздың концерті өтетінін мәлімдеді. Бұл туралы afishi_atyrau Инстаграм парақшасы хабарлады. 

«Алдағы үш жылда әлемдік жұлдыздардың қатысуымен Қазақстанда тағы 10 ірі концерт жоспарланған. Әзірге нақты қай әншінің келетіні белгісіз», – делінген жазбада.

Осы ретте, ескеретін бір жайт, елімізде 30-40 мың адам сыятын музыкалық сахна мен арена жоқ. Сондықтан Қазақстанда халықаралық деңгейдегі ірі концерттер спорт стадиондарында өтеді. Ал олардың дені Алматы мен Астанада орналасқан. Солардың ішіндегі ең ірісі – "Астана Арена".  

Спорт пен шоу-бизнес қақтығыса ма?

Кешенді дайындықты қажет ететін мұндай концерттер футбол кестесіне немесе спорт бәкеселеріне әсер етуі мүмкін. Себебі ауқымды іс-шараға дайындық жұмыстары үшін кем дегенде 2–3 апта қажет. 

Әлемдік тәжірибе

Әлемдік тәжірибеге қарасақ, спорт пен шоу-бизнесті инфрақұрылым арқылы сәтті үйлестіріп отырған елдер көп. Олар спортшылар мен музыканттарды бір стадионға "сыйғызып" қоюдан бұрын, әрқайсысына арнайы алаңдар дайындап қойған.

Ұлыбритания

• "Уэмбли" стадионы – футболға арналса да, арнайы концерттік жабдықтары бар. Бірақ мұнда концерттер маусымаралық кезеңге ғана жоспарланады.
• O2 Arena – әлемдік турлар мен музыкалық шоулар үшін жеке жабық кешен. Футбол, хоккей, теннис, бокс – бөлек нысандарда өтеді.

АҚШ

• Madison Square Garden (Нью-Йорк) – концерт, баскетбол және хоккейге бейімделген мультифункционалды арена, бірақ әрбір шара нақты күнтізбе бойынша өтеді.
• NFL (америкалық футбол) стадиондары маусымнан тыс уақытта ғана концертке беріледі. 

Германия

• Olympiastadion (Берлин) – Концерттер Bundesliga аяқталған соң ғана өткізіледі.

Жапония

• Tokyo Dome – концертке арналған жабық арена, ешқандай футбол ойынына арналмаған.