Волейболдан Қазақстан әйелдер құрамасы Вьетнамда өтіп жатқан AVC Ұлттар кубогында жеңісті жолын жалғастыруда. Кезекті, үшінші матчта волейболшыларымыз Индонезия құрамасын сенімді жеңді.
Ришат Гилязутдинов баптайтын құрама ойынды өте сенімді бастады. Алғашқы сәттерден-ақ біздің қыздар өз артықшылықтарын көрсетіп, бірінші партияны 25:17 есебімен аяқтады. Одан кейінгі сет те қарқынды өтіп, 25:12 нәтижесімен тағы да біздің пайдаға шешілді.
Үшінші сетте аздаған босаңсу байқалды. Индонезиялықтар есепті теңестіріп, қарсылық танытқанымен қазақстандықтар 26:24 есебімен жеңісті жұлып алды.
Осылайша Қазақстан құрамасы AVC турниріндегі үшінші жеңісін тіркеді.
11 маусым күні Қазақстан құрамасы Филиппинмен кездеседі. Бұл матч жарыс кестесіне үлкен әсер етуі мүмкін.
