Анна Данилина WTA сыйлығына үміткер атанды
Қазақстандық теннисші Әйелдер теннисі қауымдастығының 2026 жылғы маусым қорытындысы бойынша табысталатын WTA Awards марапатына үміткерлер қатарына енді.
Данилина сербиялық Александра Круничпен бірге Fan Favorite: Doubles номинациясына ұсынылды. Бұл аталымда жанкүйерлердің таңдауы бойынша маусымның үздік жұптық дуэті анықталады.
Марапатқа үміткерлер тізіміне Катерина Синякова мен Тейлор Таунсенд (Чехия/АҚШ), Габриэла Дабровски мен Луиза Стефани (Канада/Бразилия), Кристина Младенович пен Го Ханьюй (Франция/Қытай) сынды әлемдік теннистегі танымал жұптар енген.
Данилина мен Крунич маусымды қалай өткізді?
2026 жылғы маусым Анна Данилина мен Александра Крунич үшін табысты болды. Қазақстандық-сербиялық дуэт Дохада өткен WTA 1000 санатындағы турнирде чемпион атанып, Australian Open және "Ролан Гаррос" жарыстарының финалына дейін жетті.
Сондай-ақ қос теннисші WTA қорытынды турниріне жолдама алғанымен, жарыс басталар алдында Александра Крунич тізесіндегі жарақатына байланысты қатысудан бас тартты. Нәтижесінде жұп турнирдегі кездесулерін өткізе алмады.