Таиланд астанасы Бангкок қаласында жастар арасындағы Азия чемпионатында қазақстандық боксшы Нұрислам Қалдыбаев қарсыласын нокаутпен жеңді.
U22 санатындағы Азия чемпионатында 60 келіге дейінгі салмақта өнер көрсетіп жатқан Нұрислам Қалдыбаев 1/8 финалда Оңтүстік Корея өкілі Сён Хун Юмен қолғап түйістірді. Кездесудің екінші раундында отандасымыз қарсыласын нокдаунға түсірсе, шешуші үшінші раундта төреші екі мәрте корейлік боксшыға есеп ашуға мәжбүр болды. Жекпе-жек барысы толық Нұрисламның бақылауында өтіп, төреші кездесуді уақытынан бұрын тоқтатты.
Нұрислам Қалдыбаев биыл мамыр айында Шри-Ланка астанасы Коломбо қаласында өткен Халықаралық бокс қауымдастығы (IBA) ұйымдастырған жастар арасындағы Азия чемпионатында алтын медаль жеңіп алған еді. Енді ол World Boxing ұйымының қолдауымен өтетін бұл жарыста да чемпион атағын жеңіп алуға ұмтылуда.
