Таиланд астанасы Бангкокта World Boxing ұйымы ұйымдастырған тұңғыш жастар арасындағы Азия чемпионатында Қазақстан құрамасының кезекті финалисі анықталды.
U22 санатындағы жарыстың жартылай финалында Санжарәлі Бегалиев Үндістан өкілі Анкушпен қолғап түйістірді. Үш раундқа созылған жекпе-жекте қазақстандық боксшының айқын басымдығы байқалып отырды.
Кездесу соңында барлық төреші бірауыздан жеңісті Бегалиевке берді. Ал үндістандық спортшы қола медальмен шектелді.
Айта кетейік, Санжарәлі Бегалиев 2024 жылы Черногорияның Будва қаласында өткен IBA ұйымдастырған жастар арасындағы әлем чемпионатында алтын медаль жеңіп алған. Ол — Қазақстанның ең үмітті жас боксшыларының бірі.
