Таиландтың астанасы Бангкокта өтіп жатқан World Boxing ұйымының жастар арасындағы алғашқы Азия чемпионатында (U19 және U22) Нұрсұлтан Қыстаубай сенімді жеңіске қол жеткізді.
85 келіге дейінгі салмақ дәрежесінде жартылай финалдық айқаста ол үндістандық Гауравпен күш сынасты. Үш раундқа созылған кездесуде Қыстаубай айқын басымдық танытып, төрешілердің бірауызды шешімімен жеңіске жетті. Үшінші раундта қазақстандық боксшы қарсыласын нокдаунға жіберіп, жеңісін тіпті айқын етті.
Осы жеңістің арқасында Нұрсұлтан Қыстаубай финалға шықты, ал Гаурав қола медаль иегері атанды. Айта кетейік, бұл чемпионат — World Boxing ұйымы ұйымдастырған жастар арасындағы Азия біріншілігінің тарихындағы алғашқы жарыс.
