Таиланд астанасында өтіп жатқан World Boxing ұйымдастырған жастар арасындағы Азия чемпионатында (U-19) қазақстандық боксшы Расул Асанханов ел қоржынына екінші алтын медаль салды.
Расул Асанханов 90 келіге дейінгі салмақ дәрежесіндегі финалда үндістандық Хемант Сангванмен қолғап түйістірді. Қазақстандық боксшы төрешілердің бөлек шешімімен жеңіске жетті. Екінші раундта Расул қарсыласын нокдаунға жіберіп, айқын басымдық көрсетті.
Бұл жеңіс Асанхановқа Азия чемпионатының алтын медалін сыйласа, Хемант Сангван күміс жүлдемен шектелді. Осылайша, Қазақстан құрамасы Бангкоктағы бәсекеде екінші алтынға қол жеткізді.
Биылғы Азия чемпионаты — U-19 және U-22 жас санаттары бойынша өткен, World Boxing ұйымы ұйымдастырған тұңғыш құрлықтық жастар жарысы. Бұл дода Азия боксындағы жаңа дәуірдің бастауы ретінде тарихқа енді.
