Бангкокта (Таиланд) өтіп жатқан World Boxing ұйымының жастар арасындағы Азия чемпионатында Гүлназ Бөрібаева алтын медаль олжалады.
U22 жас санатындағы финалдық бәсекелердің алғашқы күні қазақстандық Гүлназ Бөрібаева мен өзбекстандық Робияхон Бахтиёрова арасындағы жекпе-жек шын мәнінде көрермен күткен көрініске айналды.
Бірінші раунд: төрешілердің шешімімен 4:1 есебімен Бөрібаеваның пайдасына жазылды.
Екінші раунд: Бахтиёрова қарқынын үдетіп, 3:2 есебімен басым түсті.
Шешуші раунд: тартысты сәттерден кейін төрешілер 4:1 есебімен Гүлназды жеңімпаз деп таныды.
Осылайша Гүлназ Бөрібаева – 22 жасқа дейінгі Азия чемпионы, ал қарсыласы Робияхон Бахтиёрова күміс жүлдегер атанды.
Бұл біріншілік – World Boxing ұйымы өткізген жастар арасындағы алғашқы құрлықтық чемпионат. Бангкоктағы дода Азия бокс тарихында жаңа кезеңнің басталғанын көрсетті.
